Op-Ed

Sama-samang lumaban at ipagwagi ang pagkakapantay-pantay – True Colors Coalition

LGBTQI Filipinos may celebrate Pride once a year, but they continue to face discrimination. And so for True Colors Coalition, “ipagpapatuloy natin ang ating laban. At titiyakin ang pagwawagi para sa lipunang walang diskriminasyon at may pagkakapantay-pantay.”

Statement of True Colors Coalition on the need to pass an anti-discrimination law

Ibinigay ng True Colors Coalition (TCC) ang pinakamahigpit at mainit na pakikiisa sa lahat ng LGBT na patuloy na lumalaban para sa pagkakapantay-pantay at sa pagkakaroon ng isang Anti-Discrimination Law sa ating bansa.

Sa maraming panlalait at pangmamaliit sa ating mga LGBT, hindi na natin matandaan ang lahat ng salita. Sa maraming pananakit at pagpatay na ginawa sa ating mga kapatid, hindi na natin halos  gustong balikan ang lahat. Ngunit ang lahat ng ito ay ang siyang dahilan upang tayo’y magpatuloy na lumaban para sa ating mga karapatan.

Ang katumbas ng pagiging “malas”, “salot”, “sakit” ng lipunan – buhay at seguridad ng bawat isang LGBT ang naiisalang. Ilang trans women nab a ang pinatay? Ilang bakla na ba ang nilalait at sinasaktan sa kani-kanilang mga komunidad? Ilang lesbyana na ba ang nababastos saan man sila magpunta? Ilang bisekswal na ba ang sinabihang ang kanilang pag-iral ay hindi totoo? Sa lahat ng ito, ilan ang nakapagkamit ng hustisya? At ilan ang nabigyan ng proteksyon mula sa pang-aalipusta?

Ilang taon na rin tayong patuloy na nagdaraos ng Pride March, isang araw sa buong taon na nagagawa nating magsama-sama para sa ating komunidad at para sa ating karapatan. Ngunit, hanggang ngayon nananatili ang diskriminasyon, at karahasan na dinaranas ng mas dumaraming bilang ng LGBT at walang tiyak na nagiging bahagi ang estado upang ipagtanggol ang atin seguridad.

Ngayong araw na ito, ipagpapatuloy natin ang ating laban. At titiyakin ang pagwawagi para sa lipunang walang diskriminasyon at may pagkakapantay-pantay.

Nabubuhay tayo para sa mga taong nagmamahal sa atin. Nabubuhay tayo para sa mga taong tunay na tumatanggap sa atin. Nabubuhay tayo para sa ating mga sarili. Nabubuhay tayo at patuloy na lalaban para sa mga kagaya ni Jennfer Laude na hindi na nakuhang ipagtanggol ang kanyang sarili. Para sa mga kagaya ng trans woman na inatake ng pitong kalalakihan sa Cebu nung March 12. Para sa mga kagaya ni Jaja ng Pampanga na natagpuan na lang na patay at may 57 saksak. Patuloy tayong lalaban para sa mga kagaya ni Simeona Eva na isang labing-pitong taon na trans mula sa Novaliches na natagpuang patay dahil sa 7 saksak. At para sa mga kagaya ni Jimmy Vosotros na natagpuan sa madilim na lugar sa Cebu na nakabalot ng trash bag at packaging tape na isa sa mga unang kolateral ng gera sa droga.

Lagi nating tatanganan na ang paglabag sa karapatan ng isa ay paglabag sa karapatan ng lahat, hangga’t may mga tao sa lipunan na naniniwala na ang kakaiba sa kanila ay walang karapatan at itinuturing na hindi kapantay, mananatili ang karahasan bilang kalakaran sa ating lipunan, at patuloy na mamamayani ang takot sa katotohanan ng pag-iral ng LGBT bilang mga tao, sa pagsasama-sama ng ating lakas kaya nating baligtarin ang lahat ng ito. Titiyakin natin na ang mga susunod na henerasyon ay hindi manunukat sa pagiging LGBT. Hindi manunukat ayon sa stereotyping at typecasting na nilikha ng nakaraan at kasalukuyang lipunan. Titiyakin natin na ang lipunan ay magiging isang ligtas na lugar para sa bawat isang mamamayan – anuman ang kanyang kulay, lahi, trabaho, at/o kasarian.

Ang araw na ito, at ang mga susunod pa, ay magsisilbing pagguhit natin para sa isang bagong kasaysayan ng paglaban.

Lagi nating tatanganan na an gating pag-iral ay may kasing kabuluhan sa pag-iral ng iba pang mamamayan sa lipunan. Sama-sama nating papandayin ang isang lipunang walang pagsasamantala ng tao sa kanyang kapwa tao.

Click to comment

Leave a Reply

Your email address will not be published. Required fields are marked *

Protected by WP Anti Spam
To Top