Pilit kong iniisip
Kung inisip ko at pinilit
Kung nagbago ba ang ihip
Ng hangin noong ako’y isang paslit
Ang paghanga sa kapwa babae
Ang kilos, lakad at pananalita
Na animo’y lalake
Na nagsimula noong ako’y bata
Tinanong ako kung ako ba’y humanga
Sa mga guwapo at pogi
At ang sagot ko’y oo nga
Pagtangi ay sa babae lagi
Ni minsa’y hindi kinilig
Kahit na noong panahong
Maliit pa ang mga bisig
Suot ay bestida at hindi lontang maong
Matagal na proseso
Matagal na nilihim
Hindi umasenso
Dahil sa sariling paninimdim
Hanggang ako’y namulat
At seryosong nagkagusto
At sinimulang isulat
Nilahad, ipinusta pati pamato
Wala naman kasing nagturo
Naramdaman na lang
Tapos para akong tuliro
Noong ako’y pitong taong gulang
Kaibigan ko siya
Sa ikalawang baitang
Kapag kasama’y masaya
Kapag naka-akbay ay lutang
Marami nang napusuan
Panahon na ang lumipas
Gusto’y babae pa rin naman
Sa pagkatorpe’y walang kupas
Madalas sakin ay tinatanong
Kahit hanggang opisina
Siguro sila’y hilong talilong
Kung Ma’am o Sir ang itatawag twina
Babae po ako
Ngunit babae rin ang gusto ko
Pang-lalake man ang kilos at anyo
Sa babae pa rin naman ako nagbabanyo
Lesbiyana kung ako’y tawagin
Tomboy sa kanto namin
Ate sa kapatid ko
Tita sa mga pamangkin ko
Eto ang aking SOGIE
Lesbiyana – Sexual Orientation
Babae – Gender Identity
Butch/masculine – Gender Expression
Hindi napipilit ang puso
Kusang tumitibok sa ritmo
Hindi ito parang damit na nakiki-uso
Hindi sinisino kahit amo
Masarap sanang maging malaya magmahal
Malaya sa mga matang mapanghusga
Malimit pang nasasabihan ng hangal
Madalas pang tumanggap ng pang-aalipusta
Pantay-pantay na karapatan
Dinggin sana ang aming hiling
Hindi espesyal ang aming panawagan
Sugat ng diskriminasyo’y laging nasasaling
Lungkot ay aking ramdam
Kapag hindi niyo maintidihan
Sana hindi niyo maranasan
Ang araw-araw naming pinagdadaanan
Kapag maganda o guwapo sa paningin
Sayang ang palaging sinasabi sa amin
Pero bakit sayang ang sasabihin?
Ano bang nasayang sa amin?
Isa po akong babae
Mahigit apat na pung taong gulang na
Mukha lang pong lalake
Isa pong lesbiyana
